талаш

Кыргыз тилинин түшүндүрмө сөздүгү (kg-kg)

талаш

I зат. 1. Бирдей болуп чыкпаган, ар түрдүү ойлордон, пикирлерден же келише албоочулуктан пайда болгон айтыш, тартыш. Уюштуруу маселеси боюнча талаш-тартыштар көп болду («Ала-Тоо»). Бул талаш төгүнүнөн чыккан жок (Бейшеналиев).
2. Ачык-айкын эмес, чечиле элек. Азырынча бул иш талаш.
♦ Күүгүм талаш к. күүгүм.
ТАЛАШ II этиш. 1. Кандайдыр бир маселе боюнча же кандайдыр бир максатка байланыштуу тартышка түшүп айтышуу, тартышуу, өзүнүн оюн далилдөөнүн аракетин кылуу. Ашым дагы эле болбой сөз талаша берди (Каимов).

2. Белгилүү бир кызыкчылыкты көздөө, таламды, намысты жактоо. Элдин таламын талашат. Намыс талашып, душманга бет алып кармашуу.
3. Өз жагына алуу, өзүнө ыйгаруу аракетин кылуу. Тамак талашып урушмак белек. Бул дүнүйөнү менден талаша тургандай кандай акың бар? («Ала-Тоо»).

♦ Жан талашуу — 1) өлүм алдында алдастоо, жаны өтө кыйналуу; 2) аябай аракеттенүү, тырышуу, жанын үрөп киришүү. Ишти бүтө коёюн деп жан талашкан элем («Ала-Тоо»).