Коронавирус — сүт эмүүчүлөрдүн жана канаттуу куштардын ооруга чалдыгышын пайда кылган белгилүү бир вирустардын тобу.

Коронавирустар адамдардын дем алуу жолдорунун инфекциясын жаратат. Ал айрым учурларда кадимки суук тийүүнүн себеби болуп (риновирустар себеп болушуна басымдуулук кылат) жеңил өтүшү мүмкүн, же жашоого коркунучтуу «Дем алуу органдарынын синдрому» (SARS), «Жакынкы Чыгыш респиратордук синдрому» (MERS) жана COVID-19 сыяктуу илдеттерге алып келиши ыктымал.

Коронавирустар Riboviria дүйнөсүнүн, Nidovirales түркүмүнүн, Coronaviridae тукумуна кирип, Orthocoronavirinae тукумчасын түзүшөт. Алар бир чынжырлуу РНК геномун (рибонуклеин кислотасы) жана спираль симметриялуу нуклеокапсид камтыган чел сымал вирустар. Аты латын тилинен «таажыны» билдирет, анын себеби коронавирустун челинин тышкы көрүнүшүндө.

COVID-19

COVID-19 же жаңы коронавирус (КоВ) — бул 2019-жылы ачылган коронавирустардын ичинен акыркысы тарабынан пайда болгон оору.  «CO» «коронавирус» (corona), VI — «вирус» (virus), ал эми D — «оору» (disease) дегенди билдирет. Буга чейин бул дарт «2019-жылдын жаңы коронавирусу» же «2019-нКоВ» деп аталып келген. COVID-19 вирусу оор респиратордук синдромду (ТОРС) жана КДВОнун (курч дем вирустук ооруларынын) айрым типтерин пайда кылуучу вирустар таандык болгон вирустардын түркүмү менен байланышкан жаңы вирустан турат.

Булак - https://ky.wikipedia.org/wiki/%D0%9A%D0%BE%D1%80%D0%BE%D0%BD%D0%B0%D0%B2%D0%B8%D1%80%D1%83%D1%81